தமிழில் இன்றைக்கு முழுமையாகக் கிடைத்துள்ளனவற்றுள் தொல்காப்பியம் தொன்மை மிக்க இலக்கண நூலாகும். தமிழ் மொழியின் வளத்தையும் இலக்கியச் செழுமையினையும் எடுத்துக்காட்டும் இவ்வரிய மொழியியல் நூலினை இயற்றியவர் தொல்காப்பியர் ஆவார்.

1610 நூற்பாக்களை உள்ளடக்கிய இந்நூல் எழுத்ததிகாரம், சொல்லதிகாரம், பொருளதிகாரம் என்னும் மூன்று பெரும்பிரிவுகளை உடையது. ஒவ்வோர் அதிகாரமும் 9 இயல்களைக் கொண்டதாகும்.

பேச்சு மொழியிலும் எழுத்துமொழியிலும் வழங்கும் தமிழின் எழுத்து-ஒலிவடிவங்களையும் அவற்றின் பிறப்பையும் உருபொலியன் கட்டமைப்பையும் எழுத்ததிகாரம் கூறுகிறது. சொல்லதிகாரம் சொல்வகைமைகளையும் உருபியல் தொடரியல் கட்டமைப்புகளையும் பேசுகிறது. பொருளதிகாரம் அகப்புறக் கோட்பாடுகள் உள்ளடங்கிய கவிதையியலையும் யாப்பியலையும் உவமைகளையும் மெய்ப்பாடுகளையும் மொழி மரபியலையும் இயம்புகிறது.

தொல்காப்பியம் முழுமைக்கும் இளம்பூரணர் உரை எழுதியுள்ளார். நச்சினார்க்கினியர் எழுத்ததிகாரம், சொல்லதிகாரம், பொருளதிகாரத்தின் முதல் ஐந்து இயல்கள் (அகத்திணையியல் முதல் பொருளியல் வரை) ஆகியனவற்றிற்கு உரை எழுதியுள்ளார். சொல்லதிகாரத்திற்குச் சேனாவரையர், தெய்வச்சிலையார், கல்லாடனார் ஆகியோர் உரை எழுதியுள்ளனர். பொருளதிகாரத்தின் பின் நான்கு இயல்களுக்குப் (மெய்ப்பாட்டியல் முதல் மரபியல் வரை) பேராசிரியரின் உரை கிடைத்துள்ளது.