நான்கு அடி வெண்பாக்களால் ஆன இந்நூல் ஆர் விகுதி பெற்று நாலடியார் எனப் பெயர் பெற்றது. இந்நூலினை நாலடி, நாலடி நானூறு, வேளாண் வேதம் என்னும் பெயர்களாலும் அழைப்பர். இந்நூல் சமண முனிவர்களால் பாடப்பட்ட தொகை நூலாகும். திருக்குறளோடு ஒப்ப வைத்து இந்நூலைப் பாராட்டுவர். ‘ஆலும் வேலும் பல்லுக்கு உறுதி; நாலும் இரண்டும் சொல்லுக்கு உறுதி’ பழகுதமிழ்ச் சொல்லருமை நாலிரண்டில் என்பன அப்பாராட்டு மொழிகள்.

நாலடியாரில் கடவுள் வாழ்த்து நீங்கலாக 400 பாடல்கள் உள்ளன. அறம், பொருள், இன்பம் எனும் மூன்று பால்களும் 40 அதிகாரங்களும் உள்ளன. ஒவ்வொரு அதிகாரமும் திருக்குறளைப் போலவே பத்துப் பத்துப் பாடல்களைக் கொண்டிருக்கும். இந்நூலுக்குத் தருமர், பதுமனார் முதலியோர் உரை எழுதியுள்ளனர்.